Hormatly Prezidentimiziň baştutanlygynda Berkarar döwletiň täze eýýamynyň Galkynyşy döwründe ýurdumyzda durmuşyň hemme tarapyny öz içine alýan ägirt uly işler amala aşyrylýar. Gazanylýan üstünlikler, ýetilýän sepgitler Arkadagly Gahryman Serdarymyzyň mukaddes Garaşsyzlygymyzdan gözbaş alýan parasatly döwlet syýasatynyň ajaýyp miweleridir.
Hormatly Prezidentimiziň «Watan diňe halky bilen Watandyr! Döwlet diňe halky bilen döwletdir!» diýen taglymaty Türkmenistanyň ösüş syýasatynyň düýp özenini düzýär. Türkmenistanyň içeri we daşary syýasatynyň baş maksadynyň adam hakyndaky aladadygyny Berkarar döwletiň täze eýýamynyň Galkynyşy döwründe Garaşsyz, hemişelik Bitarap Türkmenistanyň ähli künjeginde, ähli pudaklarynda alnyp barylýan işler, amala aşyrylýan il bähbitli özgertmeler, ýerine ýetirilýän wezipeler we göz öňünde tutulýan belent maksatlar aýdyň subut edýär.
Türkmenistanyň Demokratik partiýasy öz işini Türkmenistanyň Konstitusiýasyna, «Syýasy partiýalar hakyndaky» Türkmenistanyň Kanunyna, Maksatnamasyna we Tertipnamasyna laýyklykda guramak bilen, beýleki jemgyýetçilik guramalary bilen bilelikde hormatly Prezidentimiziň baştutanlygynda ýurdumyzda amala aşyrylýan ägirt uly tutumly işleriň giňden düşündirilmegine, wagyz edilmegine, üstünlikli amala aşyrylmagyna hemmetaraplaýyn ýardam bermegi özüniň baş wezipesi hasaplaýar. Şu maksat bilen Türkmenistanyň Demokratik partiýasy döwlet edaralarynda, jemgyýetçilik guramalarynda, senagat we oba hojalyk pudaklarynda işleýän öz agzalarynyň üsti bilen hormatly Prezidentimiziň içeri we daşary syýasatyny, Berkarar döwletiň täze eýýamynyň Galkynyşy döwrüniň bize beren bagtyny wagyz-nesihat etmek boýunça ilat arasynda geçirilýän terbiýeçilik, syýasy-düşündiriş işleri arkaly jemgyýetimiziň ösüşine öz täsirini ýetirýär.
Partiýa guramalarynyň işjeňligini ýokarlandyrmak, jemgyýetçilik guramalarynyň agzalaryny ýurdumyzyň durmuşyndaky şanly seneleri ýokary derejede mynasyp garşylamaga ugrukdyrmak, buýsançly geçmişimizi, şanly şu günümizi, eşretli ertirimizi, özgertmelere beslenýän bagtyýarlyk döwrümiziň ajaýyp üstünliklerini wagyz-nesihat etmek işleri ýokary guramaçylykly alnyp barylýar. Halkymyzyň döredijilik güýjüni bir ugra gönükdirip, Arkadagly Gahryman Serdarymyzyň giň möçberli maksatnamalaryny durmuşa geçirmäge işjeň gatnaşmak, il-ýurt bähbitli işleriň ählisiniň başlangyjynda, wakalaryň jümmüşinde bolmak partiýa guramalarynyň alyp barýan syýasy-jemgyýetçilik işiniň esasynda durýar.
Hormatly Prezidentimiziň tabşyryklaryndan we öňde goýýan wezipelerinden ugur alýan TDP-niň etrap komiteti, etrabyň beýleki jemgyýetçilik guramalary bilen bilelikde edara-kärhanalarda, orta we orta hünär okuw mekdeplerinde hormatly Prezidentimiziň adalatly döwlet syýasatyny, gündelik amal edýän beýik tutumlaryny wagyz etmek bilen, ilat arasynda geçirýän terbiýeçilik, syýasy-düşündiriş işleri arkaly jemgyýete öz täsirini ýetirýär.
Partiýanyň guramaçylyk işlerini kämilleşdirmek, olaryň täsirliligini ýokarlandyrmak, etrap partiýa komiteti tarapyndan ilkinji partiýa guramalaryna goldaw-ýardam, usuly kömekleri bermek, şeýlelikde, olaryň işjeňligini ýokarlandyrmak, TDP-niň Maksatnamasynyň we Tertipnamasynyň talaplaryny berjaý etmek, partiýa hataryny hil we san taýdan ösdürmek, partiýanyň ýaş agzalary bilen iş geçirmek meseleleri üns merkezinde saklanylýar, ilkinji partiýa guramalarynyň iş tejribelerini öwrenmek we ýaýratmak boýunça işler geçirilýär.
Halkyň beýik geljegi üçin taryhy işleri durmuşa geçirýän türkmen halkynyň Milli Lideri Gahryman Arkadagymyzyň hem-de hormatly Prezidentimiz Arkadagly Gahryman Serdarymyzyň janlary sag, ömürleri uzak, alyp barýan il-ýurt bähbitli işleri hemişe rowaç bolsun!
Kuwat Mämmedow, TDP-niň Akdepe etrap komitetiniň bölüm müdiri
"Daşoguz habarlary" welaýat gazeti
19.12.2024 ý
