BÄHERDEN. Etrabyň Ýarajy geňeşliginiň çägindäki Howuzlyja jülgesinde şatlyk-şowhuna beslenen dabara geçirildi. Welaýat häkimliginiň, Medeniýet müdirliginiň hem-de jemgyýetçilik guramalarynyň bilelikde guramagynda bolan dabara milli öwüşginli tomaşalara beslendi. Tebigatyň gözel künjegindäki toý meýdançasyna ýygnanan ildeşlerimiz medeniýet we sungat ussatlarynyň joşgunly sungat çykyşlaryndan ruhy lezzet aldylar. Milli aýdym-saz sungatynyň ýeten belent derejesini şöhlelendiren belent ruhly aýdymlarda, şirin mukamly sazlarda, tans we halk döredijilik çykyşlarynda şöhraty dünýa dolan behişdi bedewlerimiziň waspy buýsançly beýanyny tapdy.
Toý gazanlarynda milli tagamlaryň taýýarlanýan, tamdyrda çörek ýapylýan pursatlary, çarwa durmuşyny açyp görkezýän görnüşler, ahalteke bedewlerine atlanan milli lybasly ýigitleriň görkezme çykyşlary dabaranyň toý joşgunyny artdyrdy.
Hoşgeldi Ataýew, Türkmenistanyň Demokratik partiýasynyň Bäherden etrap komitetiniň başlygy
"Ahal durmuşy" welaýat gazeti
01.05.2025 ý
