Garaşsyzlyk baýramynyň öňýanynda geçirilmegi däbe öwrülen Halk Maslahatynyň nobatdaky mejlisiniň geçiriljek güni barha ýakynlaşýar. Bu ählihalk forumynyň geçiriljek güni golaýlaşdygy saýy oňa taýýarlyk işleri hem barha gyzyşýar. Ata-babalarymyzyň «Maslahatly biçilen don gysga bolmaz» diýen pähimine eýerilip geçirilýän Halk Maslahatynyň mejlisinde il-ýurt bähbitli işler ara alnyp maslahatlaşylýar, degerli çözgütler kabul edilip, hemmelerde kanagatlanma duýgusyny döredýär.
Gahryman Arkadagymyzyň başlyklyk etmeginde Maslahat köşgünde geçirilen Halk Maslahatynyň Prezidiumynyň nobatdaky mejlisiniň dowamynda ählihalk forumyny hem-de döwletimiziň Garaşsyzlygynyň 34, hemişelik Bitaraplygynyň 30 ýyllyk baýramlaryny ýokary derejede geçirmek boýunça meseleleriň giň toplumy ara alnyp maslahatlaşyldy. Gahryman Arkadagymyz mejlise gatnaşyjylara ýüzlenip, milli ýörelgämiziň dowam etdirilip, möhüm wezipeleri ara alyp maslahatlaşmagyň demokratik däpleriň biridigini aýtdy. Häzirki taryhy döwürde bu asylly däbiň döwletiň ösüşiniň esasynda, ileri tutulýan wezipeleri çözmekde jemgyýetiň hereketlendiriji güýjüne öwrülendigini belledi.
Türkmenistanyň Halk Maslahatynyň mejlisine ýokary derejede taýýarlyk görmek hem-de ony guramaçylykly geçirmek, Berkarar döwletiň täze eýýamynyň Galkynyşy döwründe ata Watanymyzy durmuş-ykdysady taýdan ösdürmek boýunça öňde durýan möhüm wezipeler bilen bir hatarda Garaşsyzlygymyzyň şanly baýramy mynasybetli dürli ugurlarda ýokary zähmet üstünliklerini gazanan, il içinde uly abraýdan we sylagdan peýdalanýan ildeşlerimizi döwlet sylaglaryna, hormatly atlara hödürlemek boýunça işleri alyp barmak, şonuň ýaly-da hemişelik Bitaraplygymyzyň 30 ýyllygyny ýokary derejede geçirmek bilen bagly meseleleriň giň toplumy ara alnyp maslahatlaşylyp, bu babatda dürli sowallara garaldy. Mejlisiň barşynda ýurdumyzyň welaýatlaryndaky etraplardyr obalaryň ýaşaýjylaryndan gelip gowşan haýyşnamalar esasynda täze etraplaryň birnäçesini döretmek bilen bagly teklipleriň taýýarlanylandygy habar berlip, olar Halk Maslahatynyň nobatdaky mejlisine hödürlenildi.
Türkmenistanyň Halk Maslahatynyň mejlisinde ýurdumyzy durmuş-ykdysady taýdan ösdürmekde öňde durýan möhüm wezipeler ara alnyp maslahatlaşylar. Munuň şeýledigini Halk Maslahatynyň Prezidiumynyň mejlisinde döredilen guramaçylyk toparynyň hem-de syýasy-jemgyýetçilik guramalarynyň, Halk Maslahatynyň ýerli wekilleriniň şu günlerde alyp barýan wagyz-nesihat we durmuşa geçirýän işlerinden-de görmek bolýar. Halk Maslahatynyň mejlisine il içinde uly hormatdan peýdalanýan adamlaryň gatnaşmagyny gazanmak hem möhüm meseleleriň biri. Häzirki döwürde ýerlerde ählihalk forumyna mynasyp wekilleri gatnaşdyrmak boýunça işler alnyp barylýar. Bu işde iri jemgyýetçilik guramalarynyň öňbaşçysy bolan Türkmenistanyň Demokratik partiýasynyň ýerlerdäki guramalarynda ýygnaklar, maslahatlar, wagyz-nesihat çäreleri geçirilip, mynasyp adamlary Türkmenistanyň Halk Maslahatynyň mejlisine wekil hökmünde gatnaşdyrmaga hödürlenilýär.
Şu günler bolsa ýurdumyzyň welaýatlaryndaky etraplardyr obalaryň ýaşaýjylaryndan gelip gowşan haýyşnamalar esasynda täze etraplaryň birnäçesini döretmek bilen bagly işler alnyp barylýar. Sanlyja gün mundan ozal etrabymyzyň Gubadag şäher medeniýet merkezinde guralan giňişleýin maslahat hem munuň aýdyň subutnamasydyr. Maslahata Türkmenistanyň Halk Maslahatynyň Diwanynyň iş dolandyryjysy Rejep Bazarowyň, Türkmenistanyň Mejlisiniň ýerli öz-özüni dolandyryş bölüminiň başlygy Maksat Gurbanowyň, Türkmenistanyň Oba hojalyk ministrliginiň ýer serişdeler gullugynyň başlygy Röwşen Rejepowyň we beýlekileriň gatnaşmagy, Türkmenistanyň Halk Maslahatynyň Prezidumynyň mejlisinde ýurdumyzda täze etraplary açmak barada, şol sanda Daşoguz welaýatynyň Akdepe hem-de Boldumsaz etraplarynyň çäginde täze etraplary açmak baradaky meselä garalmagy halkymyzyň göwün guşuny ganatlandyrdy. Munuň üçin etrabymyzyň ýaşaýjylarynyň Gahryman Arkadagymyza, Arkadagly Gahryman Serdarymyza hoşallyklary çäksizdir.
Türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň ýurdumyzyň jemgyýetçilik guramalarynyň öňünde goýýan wezipelerini abraý bilen ýerine ýetirmekde TDP-niň etrap komiteti çetde durmaýar. Biz mundan beýläk-de hak Howandarlarymyzyň jemgyýetçilik guramalaryndan, ylaýta-da, Türkmenistanyň Demokratik partiýasyndan edýän talabyny, öňde goýýan wezipelerini ýerine ýetirmekde yhlasymyzy, başarnygymyzy gaýgyrman zähmet çekeris. Halkymyzy döwletli döwranda ýaşadýan Gahryman Arkadagymyzyň, Arkadagly Gahryman Serdarymyzyň janlary sag, döwletli tutumlary rowaç bolsun!
Sapargül Rejepowa, TDP-niň Boldumsaz etrap komitetiniň başlygy
“Watan” gazeti
02.09.2025 ý
