Şu gün Türkmenistanyň Jemgyýetçilik guramalarynyň merkezinde Türkmenistanyň Demokratik partiýasynyň, Türkmenistanyň Agrar partiýasynyň Merkezi Geňeşiniň, Türkmenistanyň Senagatçylar we telekeçiler partiýasynyň Merkezi Geňeşiniň, Kärdeşler arkalaşyklarynyň Milli merkeziniň, Zenanlar birleşiginiň Merkezi Geňeşiniň, Magtymguly adyndaky Ýaşlar guramasynyň Merkezi Geňeşiniň guramagynda Ýaşulularyň halkara güni mynasybetli “Döwürlere ýörelge, nesillere görelde siz ýaşulular” atly baýramçylyk duşuşygy geçirildi.
Maslahatda çykyş edenler Türkmenistanyň Halk Maslahatynda Gahryman Arkadagymyzyň hem-de Arkadagly Gahryman Serdar Prezidentimiziň eden maksatnamalaýyn taryhy çykyşlaryndan gelip çykýan wezipeleriň many-mazmunyny we maslahatda kabul edilen çözgütleriň ähmiýetini giň halk köpçüligine düşündirmek, wagyz-nesihat etmek, durmuşa geçirmek ugrunda ýaşuly nesliň hem mynasyp onunyň bardygy hakynda giňişleýin durlup geçildi. Parasatly öwütleri, dana nesihatlary, gymmatly maslahatlary bilen agzybirligimizi pugtalandyrýan hem-de nesil terbiýesine saldamly goşant goşýan ýaşulularymyza, mähriban enelerimize çäksiz hormatyň nyşany hökmünde ýurdumyzyň ähli sebitlerinde dabaraly çäreleriň geçirilýändigini, munuň geçmişimizi, şu günümizi hem-de geljegimizi pugta baglanyşdyrýan ynsanperwerlik, hoşniýetlilik ýörelgelerimize ygrarlylygymyzy tassyklaýandygyny bellenip geçildi.
Türkmen halkynyň Milli Lideri, Türkmenistanyň Halk Maslahatynyň Başlygy, Hormatly il ýaşulusy, Gahryman Arkadagymyz berkarar döwletimizde ýaşuly nesliň ornuny has belende galdyrmakda aýratyn uly işleri bitirýär. Toý-dabaralarda, döwlet çärelerinde il sylagly ýaşululara, kümüş saçly enelere törden orun berilýär. Gahryman Arkadagymyzyň tagallasy bilen döredilen Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýanynda we Halk maslahatynyň ýanynda döredilen Ýaşulular geňeşleriniň abraýly orny gün-günden has pugtalanýar. Ýaşulular ýurtda agzybirligi saklamakda, ýaş nesilleri milli ruhda terbiýelemekde, hormatly Arkadagly Gahryman Serdar Prezidentimiziň üstünlikli alyp barýan içeri-daşary syýasatyny il içinde wagyz etmekde görelde görkezýärler.
Golaýda geçirilen Türkmenistanyň Halk Maslahatynyň mejlisinde ýaşulularyň birnäçesine “Hormatly il ýaşulusy” diýen hormatly adyň dakylmagy, ak saçly enelere “Zenan kalby” ordeniniň gowşurylmagy ata-babalarymyzdan miras galan beýik milli ýolumyzyň dowam edýändigine, döwlet derejesinde ýaşululara uly hormat goýulýandygyna şaýatlyk edýär.
Dabaraly duşuşygyň dowamynda sungat ussatlarynyň çykyşlary ýaýbaňlanyrylyp, ýaşulularymyza baýramçylyk mynasybetli ýadygärlik sowgatlary gowşuryldy. Duşuşygyň soňunda oňa gatnaşyjylar türkmen halkynyň Milli Lideri Gahryman Arkadagymyzyň hem-de hormatly Arkadagly Gahryman Serdar Prezidentimiziň janlarynyň sag, ömürleriniň uzak bolmagyny, işleriniň rowaçlyklara beslenmegini arzuw etdiler.
